ప్రజాశక్తి-సీతంపేట: జన జాతీయ గౌరవ దివస్‌ సందర్భంగా రాష్ట్ర గిరిజన సాంస్కృతిక పరిశోధన శిక్షణ సంస్థ ఆధ్వర్యంలో నిర్వహించిన రాష్ట్ర స్థాయి పోటీలలో సీతంపేట ఐటిడిఎ విద్యార్థులు సత్తాచాటారు. విశాఖపట్నంలో జరిగిన ఈ క్రీడాపోటీల్లో బాలికల ఆర్చరీ, వాలీబాల్‌లో ప్రథమ స్థానం, బాలుర ఆర్చరీ, జావెలిన్‌ త్రోలో తృతీయ స్థానాలు సాధించారు. పెయింటింగ్‌లో ప్రథమ స్థానం, వక్తృత్వ పోటీల్లో ప్రథమ, ద్వితీయ స్థానాలు, వ్యాసరచన పోటీల్లో ద్వితీయ స్థానం సాధించారు. దాంతోపాటు రాష్ట్ర స్థాయి ఆల్‌రౌండ్‌ ఛాంపియన్‌షిప్‌ను సీతంపేట ఐటిడిఎ గెలుచుకొంది. ఈ సందర్భంగా క్రీడాకారులను ఐటిడిఎ పిఒ కల్పనకుమారి సోమవారం ప్రత్యేకంగా అభినందించారు. క్రీడలను మరింతగా ప్రోత్సహించేలా చర్యలు తీసుకొంటామన్నారు. విద్యార్థులకు బహుమతులను అందజేశారు. ఈ కార్యక్రమంలో డిప్యూటీ డైరెక్టర్‌ మంగవేణి, డిప్యూటీ డిఇఒ లిల్లీరాణి, ఎఎంఒ కోటిబాబు, జిసిడిఒ రాములమ్మ, సిఎంఒ చిరంజీవులు, తదితరులు పాల్గొన్నారు.
తాజా వార్తలు
