వరంగల్‌: రాష్ట్రంలో రెండో అతిపెద్ద నగరంగా ఉన్న వరంగల్‌ను మరింత అభివృద్ధి చేస్తామని బిఆర్‌ఎస్‌ అధినేత, సీఎం కేసీఆర్‌ తెలిపారు. తెలంగాణను అన్ని రకాలుగా గోస పెట్టింది కాంగ్రెస్సేనని విమర్శించారు. ఎన్నికల ప్రచారంలో భాగంగా వరంగల్‌లో నిర్వహించిన ప్రజా ఆశీర్వాద సభలో కేసీఆర్‌ మాట్లాడారు. ”దేశంలో తలసరి ఆదాయంలో తెలంగాణ నంబర్‌వన్‌ స్థానంలో ఉంది. కంటి వెలుగు కార్యక్రమం ఉంటుందని ఎవరూ కలలో కూడా అనుకోలేదు. రాష్ట్రంలో 3 కోట్ల మందికి కంటి పరీక్షలు చేసి 80 లక్షల మందికి కళ్లద్దాలు పంపిణీ చేశాం. విద్య, వైద్య రంగాల్లో అన్ని రకాలుగా అభివఅద్ధి కార్యక్రమాలు చేస్తున్నాం. రాష్ట్రంలో రెండో అతిపెద్ద నగరంగా ఉన్న వరంగల్‌ను మరింత అభివృద్ధి చేస్తాం. తెలంగాణ ఉద్యమ సమయంలో అతిపెద్ద బహిరంగ సభను వరంగల్‌లో నిర్వహించాం.తెలంగాణ సాధించడం కోసమే బిఆర్‌ఎస్‌ పుట్టింది. ఇందిరమ్మ రాజ్యం సరిగా ఉంటే ఎన్టీఆర్‌ ఎందుకు పార్టీ పెట్టారు?. ఏ పార్టీ చరిత్ర ఏంటో ప్రజలు చూడాలి. వరంగల్‌లో గతంలో 3-4 రోజులకు ఒకసారి నీళ్లచ్చేవి. ఇప్పుడు మిషన్‌ భగీరథ ద్వారా రోజూ బ్రహ్మాండంగా వస్తున్నాయి. వరంగల్‌కు మెగా టెక్స్‌టైల్‌ పార్కు తీసుకొచ్చాం. ఏడాదిలో లక్ష మందికి ఉద్యోగాలు రాబోతున్నాయి” అని కేసీఆర్‌ అన్నారు.
తాజా వార్తలు
