న్యూఢిల్లీ : పంజాబ్‌, హర్యానాలోని 14 ప్రాంతాల్లో జాతీయ దర్యాప్తు సంస్థ (ఎన్‌ఐఎ) బుధవారం ఏకకాలంలో సోదాలు నిర్వహించింది. శాన్‌ఫ్రాన్సిస్కోలోని కాన్సులేట్‌ జనరల్‌ ఆఫ్‌ ఇండియాపై దాడులకు సంబంధించిన కేసు విచారణలో భాగంగా ఎన్‌ఐఎ ఈ సోదాలు నిర్వహించినట్లు సమాచారం. ఈ ఏడాది మార్చి 19, జులై 2న శాన్‌ఫ్రాన్సిస్కోలోని ఇండియన్‌ కాన్సులేట్‌పై దాడులు జరిగిన సంగతి తెలిసిందే. కార్యాలయంలోకి చొరబడిన దుండగులు కార్యాలయాన్ని ధ్వంసం చేయడంతో పాటు, భవనానికి నిప్పు పెట్టారు. కాన్సులేట్‌ అధికారులపై దాడికి కూడా యత్నించారు. ఈ దాడుల్లో భాగమైన కొంతమంది వ్యక్తులను ఎన్‌ఐఎ ఇప్పటికే గుర్తించింది. ఈ దాడుల వెనుక ఉన్న పూర్తి కుట్రను ఛేదించే ప్రయత్నంలోనే బుధవారం ఉదయం రెండు రాష్ట్రాల్లో 14 ప్రాంతాల్లో సోదాలు చేసింది. పంజాబ్‌లోని మోగా, జలంధర్‌, లూథియానా, గురుదాస్‌పూర్‌, మొహాలి, పాటియాలా జిల్లాలోనూ, హర్యానాలోని కురుక్షేత్ర, యమునానగర్‌ల్లోనూ ఎన్‌ఐఎ దాడులు జరిపింది.
తాజా వార్తలు
