ఇంటర్నెట్‌డెస్క్‌ : నాలుగు దశాబ్దాల్లో 400 చిత్రాల్లో నటించిన నటుడు.. 67 ఏళ్ల వయసులో పదో తరగతి చదువుతున్నాడు. ఇంతకీ అతనెవరంటే మాలీవుడ్‌ నటుడు ఇంద్రాన్స్‌. చిన్నప్పుడు ఆర్థిక ఇబ్బందుల కారణంగా చదువును నాల్గో తరగతిలోనే మానేశాడు. తిండి కోసం రకరకాల పనులు చేశాడు. 1981లో ఓ టైలరింగ్‌ షాపులో పనిచేస్తూ.. ప్రొడక్షన్‌ హౌస్‌లకు కాస్యూమ్స్‌ డిజైన్‌ చేసేవారు. ఆ పరిచయాలతోనే ఇండిస్టీలోకి అడుగుపెట్టారు. మొదట్లో పెళ్లిళ్ల బ్రోకర్‌ వంటి చిన్న చిన్న పాత్రల్లో నటించారు. 1994లో ‘సిఐడి ఉన్నికృష్ణన్‌ బి.ఎ, బి.ఇ.డి’ చిత్రంలో ఇంద్రాన్స్‌ కమెడియన్‌గా యాక్ట్‌ చేశారు. ఈ చిత్రంతో అతనికెంతో గుర్తింపు లభించింది. ఈ చిత్రం తర్వాత ఇంద్రాన్‌ ఇక వెనక్కి తిరిగి చూసుకోలేదు. వందల చిత్రాల్లో నటించి రాష్ట్ర, జాతీయ అవార్డుల్ని సైతం దక్కించుకున్నారు. కోట్లాది రూపాయల్ని సంపాదించుకున్నారు. డబ్బు, గౌరవం అన్నీ ఉన్నా.. తనకు ఇవేవీ తృప్తినివ్వలేదు. మలి వయసులో మళ్లీ తనకు చదువుపై ఆసక్తి కలిగింది. వెంటనే ఆరు పదుల వయసులో ఓ విద్యార్థిలా స్కూల్‌కెళ్లి చదువుకోవాలనుకున్నాడు. అనుకున్నదే తడవుగా.. తన ఇంటికి సమీపంలోని ప్రభుత్వ పాఠశాలలో చేరాడు. ప్రస్తుతం తాను పదో తరగతి చదువుతున్నాడు. ప్రతి ఆదివారం తరగతులకు హాజరువుతున్నారు. వచ్చే ఏడాది పదో తరగతి పరీక్షల్ని రాసే ప్రయత్నంలో ఉన్నారు ఇంద్రాన్‌. ఈ నేపథ్యంలో ఇంద్రాన్‌ చదువుపై తనకున్న ఆసక్తిని ఇలా తెలియజేశాడు. ‘నిరక్షరాస్యుడిగా ఉండటం అనేది అంధుడితో సమానం. అందుకే నేను ఇప్పుడు పదో తరగతి చదువుతున్నాను. ఒకేసారి అన్ని పరీక్షలు పాసై పదో తరగతి పూర్తి చేస్తాను.’ అని అన్నారు.
;
